Шымкент қалалық көзі көрмейтін  және әлсіз көретін азаматтарға арналған арнайы кітапханасының «Аудио» залында «ҒИБРАТ» мәдени демалыс клубының кездесуі өтті. Бүгінгі тақырып « Мәдениет пен өнер- рухани өмір мәйегі». Мамыр  айы  мереке мен шаттыққа толы күндерден құралған. Осыған орай, мамыр айындағы барлық атаулы даталы күндерді қамтыдық.

Мәдениеттің өзекті бөлігі – өнер. Шынында да, өнер мәдениеттің қазынасы, адамның ұлылығын білдіретін ғажап көріністердің бірі. Мәдениеті мен өнері өркендеген қоғам әрқашанда ілгерілеп дамиды. Еліміздің өркендеп өсуіне үлес қосып, мәдениет биігіне шығармашылық тұрғыдан қызымет етіп, халықты тамаша өнерімен қуантып келе жатқандар қаншама. Оқырмандардың арасында Бижанов Жәнібек Тамашаұлы  іс-шараға өз үлестерін қосып, әндерін шырқап ортаға салды. Бізде қонақта Аманкулова Мейіркул Ортайқызымен сұхбат болды. Өмірі мен  шығармашылығын кеңінен насихаттап, оқырман қауымына таныстырдық. Кеш қонағы өз өлеңдерін оқып, әнін шырқап, көрермен алғысына ие болды.

Қазақ Соқырлар Қоғамының Шымкент қалалық филиалының төрағасы  Пірімжанов Марат Аханұлы демеушілік көрсетіп,  «Ғибрат» мәдени демалыс клуб мүшелерін  айтулы мерекесімен құттықтап, сыйлықтар табыстады.

«Махаббатпен тербетілер тәтті өмір»

(15 сәуір ғашықтар күні)

Шымкент қалалық көзі көрмейтін және әлсіз көретін азаматтарға арналған арнайы кітапханада 15 сәуір ғашықтар күніне арналған «Махаббатпен тербетілер тәтті өмір» атты «Тағдырластар» клубының сәуірдегі думанды кеші өтті. Кешті клуб жетекшісі Ербек Бакиев жүргізді. Кешке жиналған оқырмандар «Қос аққу» және «Егіз жүрек» деген атпен екі топқа бөлініп, өнерлерін ортаға салды. Ғашықтар тақырыбына арналған кеште махаббат тақырыбында жазылған кітаптардан арнайы көрме дайындалып, көрерменге ұсынылды. Аталмыш тақырып бойынша түрлі сұрақтар қойылып, жүйрік оқырманнан ұтқыр жауаптар алынып, кейіпкерлерге кеңінен тоқталды. Мұхтар Шаханов, Әзілхан Нұршайықов, Абай шығармаларынан және Шәкәрім Құдайбердіұлының, Еңлік Кебек, Қалқаман Мамыр туындыларына тереңірек ой өрбітіп, оқырман қауымды кітаппен байланыстыратын викториналық сұрақтар ұйымдастырылды. Айтулы кеште жастар ән шырқап, жыр оқып қана қоймай түрлі ойындарға да белсенді атсалысып, жеңімпаздар сый-сиапатқа ие болды. Сезімі үндескен қос оқырман І топ көз мүгедектері ынтымағымен көңілі жарасып, отбасын құрып, тағдыры табысқан жанұя Айбек пен Айнұр өз замандастарына баянды бақыт тілеп, қиындыққа мойымай зор қайратпен отбасын құруға шақырды. Кеш барысында сәуір айында туған бір топ клуб мүшелерін туған күндерімен құттықтап, бағалы сыйлықтар табыс етті. Кеш соңында жастар суретке түсіп, ерекше көңіл күймен топтасып, кинопаркке жаңа фильмді тамашалауға жол тартты.

«INTERNATIONAL HEALTH DAY»

Шымкент қалалық көзі көрмейтін және әлсіз көретін азаматтарға арналған арнайы кітапханасының стационардан тыс қызмет көрсету секторының 7 сәуір Халықаралық Денсаулық күніне орай “Таза табиғат - Денсаулық кепілі” тақырыбында іс шара өтті.

Бұл шараға «Шымкент қаласының білім басқармасының мемлекеттік арнаулы (коррекциялық) №33 «Ақбота» балабақшасы» (көз көру функциялары ауыр және жеңіл бұзылған балаларға арналған)
коммуналдық мемлекеттік мекемесінің балалары қатысты. Әрбір адам өз денсаулығының мықты болу жолдарын қарастыру керек. Дені сау адамның көңіл күйі көтеріңкі болып, еңбекке әрқашан құлшына кіріседі.

Халқымыз «Дені саудың жаны сау» деп бекер айтпаған. Осы ұғымды балаларға жете түсіндіру жолында түрлі қызықты ойындар топқа бөлініп, l топ “Арнайы кітапхана”, llтоп “Ақбота бақшасы” болып дене қимылына арналған жаттығулар, ертегілер,бала қимылына арналған билер келісті де тартысты өтті. Екі топтың балалары да алғырлығын танытып, достық жеңіске жетіп, тәтті сыйлықтар тарту етілді.

Арнайы кітапханамыздың балаларға арналған залында түрлі түске боялған жихаздары мен кітаптары бала көңілін көтеріңкі етіп, өздерін еркін ұстауға септігін тигізіп, балалар кітапхананы қимастай кетіп тарасты.

«КӨНЕГЕ ЗЕР САЛСАҚ - ӨНЕГЕ КӨП»

Мәдени-танымдық инклюзивті іс-шарасы

Арнайы кітапханада «Ғибрат» мәдени-демалыс клубының кезекті іс-шарасында қазақтың ұмытылып бара жатқан ырым-тиымдары мен салт-дәстүрін және соның ішінде: тақия, кимешек, сәукеле, қамшымен қазақтың қара домбырасын дәріптедік.
Іс-шара қазақтың ұлттық киімдерімен тактильді танысудан басталып,
одан соң ұлттық музыкалық аспаптармен сипап-сезу арқылы танысу және аспаптың шығу тарихын баяндап, сұрақ-жауап байқауын өткіздік.
Ықыласпен қатысқан оқырмандардың орындауындағы халық әндері мен билері - қазақ мәдениетінің сұлулығы мен тереңдігін барынша сезінуге мүмкіндік берді.

Ал дәстүрлі кездесудің шырайын ашқан клуб мүшелерінің авторлық өлеңдері көпшілікті ерекше тәнті етті.

Сонымен қатар қазақ аңыздары мен әңгімелері әлеміне еніп, олардың әрқайсысын тыңдап, талдадық.

Жалпы, бұл іс-шаралар әлеуметтік интеграцияға, шығармашылықты дамытуға және қоғамдастық рухын нығайтуға ықпал етеді.

«Ғибрат» клубы болашақта инклюзивті іс-шаралар өткізуді жоспарлап отыр, ол:

Театрландырылған қойылымдар: сюжет пен эмоцияны жеткізу үшін дыбыстар мен сипаттамаларды қолдана отырып, зағиптар мен нашар көретіндерге бейімделген қойылымдар. (Қала театрларымен бірлесіп)

«Ғибрат» клубы - тек көңіл көтеріп қана қоймай, білім мен тәжірибе алмасу үшін инклюзивті кеңістік құруға тырысады.

«Жанарсызда өмірім жалғасады»

21 наурыз Дүниежүзілік поэзия күніне

Бүгін Шымкент қалалық арнайы кітапханада «Жанарсызда өмірім жалғасады» атты тағдырласымыз ақын, сазгер Айнұр Смандиярдың поэзиялық кеші болып өтті. Кеш барысында А. Смандиярдың оқырмандарымыз өлеңдерін оқып, ақынның сөзіне жазылған әндерін орындады. Дүниежүзілік поэзия күні тұңғыш рет ЮНЕСКО-ның штаб пәтері орналасқан Парижде атап өтілді. Поэзия – қасиетті ұғым. Поэзия – сезім патшалығы. Сол патшалықтың қақпасынан ақындар ғана еркін кіріп, оның гүлденіп, дамуына барын салады. Ақтөбе қаласынан да тағдырластарымыз жас ақын Мұқамедқазиев Аманжол «Асыл жарым» өлеңін жолдады. Орал қаласынан жас ақын тағдырласымыз Шымкент қаласының арнайы кітапхана оқырмандарын Поэзия күнімен құттықтап «Мұңданбаймын» атты өлең жолдарын жолдады.  Кеш қонағы жас ақын А. Смандиярдың өнеріне тәнті болған кітапхана оқырмандары ақ баталарын беріп, ҚСҚ Шымкент қалалық филиалының төрағасы Пірімжанов Марат Аханұлы алғыс хатпен марапаттап, кеш қонағына сый-сияпатын берді. Кеш соңында Айнұр Смандияр жастайынан шығармашылығының дамуына қолдау көрсеткен Арнайы кітапхана ұжымына өз алғысын шексіз ризашылығын білдіріп, шығармашылық жолында әрдайым қолдау көрсеткен Абжаппарова Ләззәт Ақылбайқызына өз атынан алғыс хатын ұсынып, шын жүректен сый-сияпатын берді. Кешке қатысқан барлық жан керемет көңіл күйге бөленіп, көңілді тарасты.